Qirq yoshlilar daftariga

Biz ham yashayotirmiz,
Qirqdan oshayotirmiz.
Yarmi oq, yarmi yashil
Qirdan oshayotirmiz.

Oqshomimiz kulrangdir,
Piyolamiz gulrangdir.
Bu ne ma’yus jarangdir?
Nechun tubinda zangdir?
Nazar tashlayotirmiz,
Qirqdan oshayotirmiz.

Muhabbatmi yo hikmat?
Mehnatmi yoki minnat?
Sevgimi yokmi sarob?
Sevinchmi yoki azob?
Qayga shoshayotirmiz?
Qirqdan oshayotirmiz.

To’ymay ota-onadan.
Qismat qurgan binodan,
Gohi ibn Sinodan,
Goh nodon-u donodan,
O’tkinchi bu dunyodan
Hasrat boshlayotirmiz,
Qirqdan oshayotirmiz.

Kim ko’nglidan uyolgan,
Ko’ngil qolib, uy slogan.
Kim dunyoga dil berib,
Tashvish, alam, o’y olgan.
Payg’ambarlardan qolgan
Sirdan oshayotirmiz,
Qirqdan oshayotirmiz.

Yuqoriga

Yangi bog’ning eshigiga

Har narsada O’zing haqsan eng avvalo,
Yomonlikni bu tuproqdin ko’tartirgin.
Odamzot ham yog’och yanglig’ o’tmasin to,
Ne bo’lsa ham, e Xudoyim, ko’kartirgin!

Yuqoriga

Yassaviy devoniga

Bu dunyoning tubini men topib qo’ydim,
Sho’ralagan tuprog’ini chopib qo’ydim.
Siz bemaslak tushib ketmang deya, uni
Yassaviyning devoni-la yopib qo’ydim.

Yuqoriga

Oqsaroy devori lavhiga

Gumbazlardan tikilgay
        Temur bobo ko’zlari,
Oqsaroy-u Ko’ksaroy
       l zotning inshosidir.
Shunchaki aytilmagay
       odsholarning so’zlari,
Podsholarning so’zlari
       o’zlarning podshosidir.

Yuqoriga

Navoiy tug’ilgan kun

(Hazrat haykali lavhiga)

Har ko’ngil ishq ichra pok

        tiynat bo’lar kundir bu kun,

Bitta so’z olam aro

        ziynat bo’lar kundir bu kun.

Tiyra dunyoga ziyo sochgay

        munavvar bir ism,

Bir ismdan bir ulus

        millat bo’lar kundir bu kun.

Yuqoriga

“Guliston” kitobiga

Ushbu “Guliston” ichra yo’q
       so’zdan go’zalroq siymu zar,
Sa’diy boboning o’zlari
       hikmat choponin kiygizar.

 

Yuqoriga

Qodiriyning shiyponiga

Bunda Bedil g’azallarin rukn, bayti bor
Va Navoiy devonlarin sukunati bor.
Bunda har barg so’ylar o’tgan kunlardan ma’no,
Bunda hanuz yerga qarab turibdi Ra’no.

Yuqoriga

“Tundaliklar” kitobiga

Bu – bir uyg’oq inson,
       ko’ngli bedorning
Umri, fasllari,
       kun, yillaridir.
“Tundaliklar” emas,
       Asqad Muxtorning
Tortgan alamlari,
       xun dillaridir.

Yuqoriga

“Turnalar” kitobiga

Qayga ketdi Rasul Hamzatov?
U bir shoir holiday ketdi.
Ajdodlarning qatoriga-yu
Avlodlarning yodiga ketdi.

Bu dunyoga, so’ng bor xo’rsinib,
G’amgin nazar soldi-da ketdi.
Odamlardan charchadi oxir,
Turnalarning oldiga ketdi.

Yuqoriga

Otamning paxsa devoriga

Menn ham bu dunyoni ko’rayotirman,
Past-u balandida yurayotirman.
Otamni sog’inib,
Otamni qo’msab,
Men ham sen kabi jim nurayotirman.

Yuqoriga

O’roqning dastasiga

Osmon o’sha.
Hamon Yetti qaroqchi bor,
Odamzotning bariga bir so’roqchi bor.
Ko’karamiz. Bo’y cho’zamiz. Sarg’ayamiz.
Hammamizni o’rguvchi bir o’roqchi bor.

Yuqoriga

Qamchining dastasiga

Bu olamda qachon dil dilga yetgay?
Umr tulpori ham manzilga yetgay.

Yuqoriga

Qabr toshiga

Har neki istasang
       sabrda topgung,
Sabrdan topmasang,
       qabrdan topgung.

Yuqoriga

Piyolaning gardishiga

Piyola aylanar.
       Davron aylanar.
Aylanadi Yer-u
       Osmon aylanar.
Tiriklik bazmida
       qancha zotlar yo’q,
Bu piyola esa
       hamon aylanar.

Yuqoriga

Polvonlarning belbog’iga

Hayot o’zi boshdan oyoq
       katta kurash deganidir,
Kurashmasang hayoting ham
       asli nurash deganidir.
Ulg’aysalar polvon bo’lib
       tuzing ichgan o’g’lonlaring,
Yot ellarda ko’krak kerib,
       yurtin so’rash deganidir.
Pisand qilmay nazar solsa
       bolangga nopisand dunyo,
Dunyoning ham burniga bir
       chertib burash deganidir.
Elning or-u nomusidir
       er yigitning belbog’i ham,
Yurt nomini yuksak sharaf
       shonga o’rash deganidir. 

Yuqoriga

Mehmonxona kitobiga eslatma

Yaxshi qo’noqlar-u
Sofdil insonga
Ko’kdan quyosh bilan oy olib bering.
Noshukur bandaga,
Nokas mehmonga
Ho’kizning shoxidan joy solib bering.

Yuqoriga

Muhabbat devoniga

Kuyi ishqida, qarangkim,
       andalib bo’ldi ko’ngil,
Andalib bo’ldi ko’ngil, ham
       aldanib bo’ldi ko’ngil.

Yuqoriga

O’zimizning tandirga

Aytmangizkim, yurtning non-u tuzi urgay,
Ota-ona va yo elning so’zi urgay.
Noshukur yo nonko’r bo’lsa qay bir farzand,
Eng avvalo shu tandirning o’zi urgay.

Yuqoriga

“Xotira maydoni” ustunlariga

Bunda necha avlodlarning
       sog’inchlari bor,
Bunda nomlar jimirlatar
       jon birla tanni.
Ustunlar ham Xotiraning
       o’ziday poydor,
Ko’tarishib turgandayin
       ulug’ Vatanni. 

Yuqoriga

Daftarimga

O’choq berdi Xudoyim,
O’tin berdi Xudoyim.
Shu o’tinga yarasha
Tutun berdi Xudoyim.
Kimga yarim, kimlarga
Butun berdi Xudoyim.
Kimga hassa, kimlarga
Ustun berdi Xudoyim.
Kimga omad qushining
Patin berdi Xudoyim.
Menga shu satrlarning
Qatin berdi Xudoyim.

2004

Yuqoriga

 

Qaldirg’och ko’zliklarim

Qizim Niginaga

Siz – qaro sochliklarim,
Oy-quyosh yuzliklarim.
Qaldirg’och ko’zliklarim.
Hayotim bo’stonida
Qator ketgan g’unchalar.
Quyosh tongdan sut olib,
Sizga yopgay kulchalar.

Buloqlarday sof, tiniq
Jilvalarim siz mening.
Sahardan o’ynoqlagan
Jilg’alarim siz mening.
Kun bo’yi jivir-jivir,
Siz- novvot so’zliklarim.
Mening sho’xliklarimsiz,
Qaldirg’och ko’zliklarim.

Muhabbatning nurlari,
Siz- mehrdan tolalar.
Ko’ngillarimga payvand,
Umrimdagi lolalar.
Mening takror bahorim,
Dunyoda izliklarim.
Erka ham nozliklarim,
Qaldirg’och ko’zliklarim.

Siz birlan xayol yetmas
Manzillarga yetgayman.
To’lqin-to’lqin yillarim,
Daryo bo’lib ketgayman.
Siz – toshqin shodliklarim,
Siz – mening o’zliklarim.
Qaldirg’och qoshliklarim,
Qaldirg’och ko’zliklarim.

Kiyiklarim bor mening,
Ko’kraklarim tog’ bo’lgay,
Siz ulg’aygan bu tuproq
Chaman bo’lgay, bog’ bo’lgay.
Erib ketgay dildagi
Ming yillik muzliklarim,
Qaldirgo’ch qoshliklarim,
Qaldirg’och ko’zliklarim.

2004

Yuqoriga